អ៊ុយក្រែន៖ លោកប្រធានាធិបតីអ៊ុយក្រែន Volodymyr Zelenskyy ក្នុងជំនួបតាមទូរសព្ទជាមួយប្រធានាធិបតីអាមេរិក លោក Joe Biden បានធ្វើការថ្លែងអំណរគុណយ៉ាងជ្រាលជ្រៅចំពោះការជួយគាំទ្រ "ដែលមិនធ្លាប់មានពីមុនមក" របស់សហរដ្ឋអាមេរិកមកកាន់អ៊ុយក្រែន ក្រោយការវាយប្រហាររបស់រុស្សីមកលើអ៊ុយក្រែន តាំងពីខែកុម្ភៈមក។ 

លោក Zelenskyy បានតាមរយៈគណនី Telegram ផ្ទាល់ខ្លួនរបស់លោកថា "លោកពិតជាអរគុណចំពោះជំនួយដែលមិនធ្លាប់មានពីមុន ទាំងវិស័យការពារជាតិ និងវិស័យហិរញ្ញវត្ថុដែលសហរដ្ឋអាមេរិកបានផ្តល់ការគាំទ្រមកកាន់ប្រទេសអ៊ុយក្រែន"។ 

លោកបានបន្តថា ជំនួយនេះមិនត្រឹមតែរួមចំណែកដល់ភាពជោគជ័យនៅលើសមរភូមិប្រយុទ្ធប៉ុណ្ណោះទេ ប៉ុន្តែថែមទាំងជួយដល់ស្ថិរភាពនៃសេដ្ឋកិច្ចអ៊ុយក្រែនផងដែរ។ យើងក៏សូមកោតសរសើរចំពោះជំនួយដែលសហរដ្ឋអាមេរិកកំពុងផ្តល់ដើម្បីស្តារប្រព័ន្ធថាមពលរបស់អ៊ុយក្រែន។

បណ្តាញហេដ្ឋារចនាសម្ព័ន្ធអគ្គិសនីរបស់អ៊ុយក្រែនត្រូវបានវាយប្រហារចាប់តាំងពីខែតុលា ដោយការវាយប្រហារដោយមីស៊ីល និងយន្តហោះគ្មានមនុស្សបើករបស់រុស្ស៊ីជាបន្តបន្ទាប់ ដែលបានកាត់ផ្តាច់ការផ្គត់ផ្គង់ចរន្តអគ្គិសនីសម្រាប់ជនស៊ីវិលរាប់លាននាក់ក្នុងរដូវរងារនេះ៕